Epistulae ad Atticum, Epistulae Volume II, Pars Prior Pars Posterior Epistulae Ad Atticum. Cicero, Marcus Tullius, creator; Purser, Louis Claude, 1854-1932, editor
Made available under the Creative Commons Attribution 4.0 International License.
47
Scr. Lanuvi xvii K. Iun. a. 709 (45).
CICERO ATTICO salutem
de
Mustela, ut scribis, etsi magnum opus est. eo magis delabor ad
Clodiam. quamquam in utroque Faberianum nomen
explorandum est. de quo nihil nocuerit si aliquid cum Balbo eris
locutus et quidem, ut res est, emere nos velle nec posse sine isto nomine nec audere re
incerta. sed quando Clodia
Romae futura est et quanti rem aestimas? eo prorsus specto, non
quin illud malim sed et magna res est et difficile certamen cum cupido, cum locuplete,
cum herede. etsi de cupiditate nemini concedam; ceteris rebus inferiores
sumus. sed haec coram.