Epistulae ad Atticum, Epistulae Volume II, Pars Prior Pars Posterior Epistulae Ad Atticum. Cicero, Marcus Tullius, creator; Purser, Louis Claude, 1854-1932, editor
Made available under the Creative Commons Attribution 4.0 International License.
34
Scr. Asturae vi K. Sext. a. 709 (45).
CICERO ATTICO salutem
Asturam veni viii Kal. vesperi. vitandi
enim caloris causa Lanuvi tris horas acquieveram. tu velim, si
grave non erit, efficias ne ante Nonas mihi illuc veniendum sit (id potes
per Egnatium Maximum), illud in primis, cum Publilio me
absente conficias. de quo quae fama sit scribes.
"id populus
curat scilicet!"
non me hercule arbitror; etenim haec decantata erat fabula.
sed complere paginam volui. quid plura? ipse enim adsum, nisi quid
tu prorogas. scripsi enim ad te de hortis.