Epistulae ad Atticum, Epistulae Volume II, Pars Prior Pars Posterior Epistulae Ad Atticum. Cicero, Marcus Tullius, creator; Purser, Louis Claude, 1854-1932, editor
Made available under the Creative Commons Attribution 4.0 International License.
sed de omnibus meis consiliis, ut scribis, existimo exploratius nos ad K.
Iunias statuere posse. ad quas adero et omni ope atque opera
enitar, adiuvante me scilicet auctoritate tua et gratia et summa aequitate causae, ut de
Buthrotiis senatus consultum quale scribis fiat. quod me
cogitare iubes, cogitabo equidem, etsi tibi dederam superiore epistula cogitandum.
tu autem quasi iam reciperata re publica vicinis tuis
Massiliensibus sua reddis. haec armis, quae quam firma
habeamus ignoro, restitui fortasse possunt, auctoritate non possunt.
epistula brevis quae postea a te scripta est sane mihi fuit iucunda de
Bruti ad Antonium et de eiusdem ad te litteris.
posse videntur esse meliora quam adhuc fuerunt. sed nobis ubi
simus et quo iam nunc nos conferamus providendum est.