Ars Amatoria, Ovid, 43 B.C.-17 or 18 A.D, creator; Ehwald, Rudolf, 1847-1927,
editor; Merkel, Rudolf, 1811-1885, editor
Made available under the Creative Commons Attribution 4.0 International License.
361
Reticuloque pilae leves fundantur aperto,
362
Nec, nisi quam tolles, ulla movenda pila est.
363
Est genus, in totidem tenui ratione redactum
364
Scriptula, quot menses lubricus annus habet:
365
Parva tabella capit ternos utrimque lapillos,
366
In qua vicisse est continuasse suos.
367
Mille facesse iocos; turpe est nescire puellam
368
Ludere: ludendo saepe paratur amor.
369
Sed minimus labor est sapienter iactibus uti:
370
Maius opus mores composuisse suos.
371
Tum sumus incauti, studioque aperimur in ipso,
372
Nudaque per lusus pectora nostra patent;
373
Ira subit, deforme malum, lucrique cupido,
374
Iurgiaque et rixae sollicitusque dolor:
375
Crimina dicuntur, resonat clamoribus aether,
376
Invocat iratos et sibi quisque deos:
377
Nulla fides, tabulaeque novae per vota petuntur;
378
Et lacrimis vidi saepe madere genas.
379
Iuppiter a vobis tam turpia crimina pellat,
380
In quibus est ulli cura placere viro.
381
Hos ignava iocos tribuit natura puellis;
382
Materia ludunt uberiore viri.
383
Sunt illis celeresque pilae iaculumque trochique
384
Armaque et in gyros ire coactus equus.
385
Nec vos Campus habet, nec vos gelidissima Virgo,
386
Nec Tuscus placida devehit amnis aqua.
387
At licet et prodest Pompeias ire per umbras,
388
Virginis aetheriis cum caput ardet equis;
389
Visite laurigero sacrata Palatia Phoebo:
390
Ille Paraetonicas mersit in alta rates;