Ibis, Ovid, 43 B.C.-17 or 18 A.D, creator; Merkel, Rudolf, 1811-1885, editor; Ehwald, Rudolf, 1847-1927, editor
Made available under the Creative Commons Attribution 4.0 International License.
XML: Passage Full Text
Causaque non desit , desit tibi copia mortis :
Optatam fugiat vita coacta necem :
125
Luctatusque diu cruciatos spiritus artus
Deserat , et longa torqueat ante mora.
Evenient . dedit ipse mihi modo signa futuri
Phoebus , et a laeva maesta volavit avis .
Certe ego , quae voveo , superos motura putabo,
130
Speque tuae mortis , perfide , semper alar .
Et prius hanc animam , nimium tibi saepe petitam ,
Auferet illa dies , quae mihi sera venit ,
>
7
Quam dolor hic umquam spatio evanescere possit,
Leniat aut odium tempus et hora meum .
135
Pugnabunt arcu dum Thraces , Iazyges hasta ,
Dum tepidus Ganges , frigidus Hister erit ;
Robora dum montes , dum mollia pabula campi ,
Dum Tiberis liquidas Tuscus habebit aquas,
Tecum bella geram . nec mors mihi finiet iras,
140
Saeva sed innocuis manibus arma dabit.
Tunc quoque , cum fuero vacuas dilapsus in auras ,
Exanimis mores oderit umbra tuos,
Tunc quoque factorum veniam memor umbra tuorum,
Insequar et vultus ossea forma tuos.
145
Sive ego , quod nollem , longis consumptus ab annis ,
Sive manu facta morte solutus ero :
Sive per inmensas iactabor naufragus undas,
Nostraque longinquus viscera piscis edet:
Sive peregrinae carpent mea membra volucres:
150
Sive meo tinguent sanguine rostra lupi:
Sive aliquis dignatus erit subponere terrae
Et dare plebeio corpus inane rogo :