Ibis, Ovid, 43 B.C.-17 or 18 A.D, creator; Merkel, Rudolf, 1811-1885, editor; Ehwald, Rudolf, 1847-1927, editor
Made available under the Creative Commons Attribution 4.0 International License.
XML: Passage Full Text
Vel qui , quae fuerat tutatus moenia saepe ,
Corpore lustravit non diuturna suo ,
335
Utque novum passa genus Hippomeneide poenae
Tractus in Actaea fertur adulter humo,
Sic , ubi vita tuos invisa reliquerit artus,
Ultores rapiant turpe cadaver equi .
Viscera sic aliquis scopulus tua figat , ut olim
340
Fixa sub Euboico Graia fuere sinu ;
Utque ferox periit et fulmine et aequore raptor,
Sic te mersuras adiuvet ignis aquas .
Mens quoque sic furiis vecors agitetur , ut illi,
Unum qui toto corpore vulnus habet;
345
Utque Dryantiadae Rhodopeia regna tenenti,
In gemino dispar cui pede cultus erat,
Ut fuit Oetaeo quondam generoque draconum
Tisamenique patri Callirhoesque viro .
Nec tibi contingat matrona pudicior illa,
350
Qua potuit Tydeus erubuisse nuru :
Quaeque sui Venerem iunxit cum fratre mariti,
Locris in ancillae dissimulata nece .
17
Tam quoque , di faciant , possis gaudere fideli
Coniuge , quam Talai Tyndareique gener :
355
Quaeque parare suis letum patruelibus ausae
Belides assidua colla premuntur aqua.
Byblidos et Canaces , si cui facis , ardeat igne ,
Nec nisi per crimen sit tibi fida soror.
Filia si fuerit , sit quod Pelopea Thyesti,
360
Myrrha suo patri , Nyctimeneque suo .
Neve magis pia sit capitique parentis amica,
Quam sua vel Pterelae , vel tibi , Nise , fuit :