Suppliant Women, Alpheios version. Enhanced TEI with Syntax Diagrams
Made available under the Creative Commons Attribution 4.0 International License.
XML: Passage Full Text
535
γενοῦ πολυμνάστωρ , ἔφαπτορ Ἰοῦς:
Δῖαί τοι γένος εὐχόμεθ᾽ εἶναι
γᾶς ἀπὸ τᾶσδ᾽ ἄποικοι.
Χορός
παλαιὸν , δ᾽ εἰς ἴχνος μετέσταν
ματέρος ἀνθονόμους ἐπωπάς,
540
λειμῶνα βούχιλον , ἔνθεν Ἰὼ
οἴστρῳ ἐρεθομένα
φεύγει ἁμαρτίνοος,
πολλὰ βροτῶν διαμειβομένα
φῦλα , διχῇ δ᾽ ἀντίπορον
545
γαῖαν ἐν αἴσᾳ διατέμ-
νουσα πόρον κυματίαν ὁρίζει:
Χορός
ἰάπτει δ᾽ Ἀσίδος δι᾽ αἴας
μηλοβότου Φρυγίας διαμπάξ.
περᾷ δὲ Τεύθραντος ἄστυ Μυσῶν,
550
Λύδιά τε γύαλα,
καὶ δι᾽ ὀρῶν Κιλίκων
Παμφύλων τε [ γένη ] διορνυμένα
καί ποταμοὺς ἀενάους
καὶ βαθύπλουτον χθόνα καὶ
555
τὰν Ἀφροδίτας πολύπυρον αἶαν.
Χορός
ἱκνεῖται δὴ σινουμένα βέλει
βουκόλου πτερόεντος
Δῖον πάμβοτον ἄλσος,
λειμῶνα χιονόβοσκον , ὅντ᾽ ἐπέρχεται
560
Τυφῶ μένος,
ὕδωρ τε Νείλου νόσοις ἄθικτον,
μαινομένα πόνοις ἀτί-
μοις ὀδύναις τε κεντροδα-
λήτισι , θυιὰς Ἥρας.