De lege agraria contra Rullum, Orationes Volume IV, Cicero, Marcus Tullius, creator; Clark, Albert Curtis, 1859-1937, editor
Made available under the Creative Commons Attribution 4.0 International License.
at videte hominis diligentiam, si aut Rullum illud
cogitasse aut si Rullo potuisse in mentem venire arbitramini.
viderunt ei qui haec machinabantur, si vobis ex omni populo
deligendi potestas esset data, quaecumque res esset in qua fides, integritas,
virtus, auctoritas quaereretur, vos eam sine dubitatione ad Cn. Pompeium
principem delaturos. etenim quem unum ex cunctis delegissetis ut eum
omnibus omnium gentium bellis terra et mari praeponeretis, certe in
xviris faciendis sive fides haberetur sive honos, et committi huic
optime et ornari hunc iustissime posse intellegebant.
itaque excipitur hac lege non adulescentia, non
legitimum aliquod impedimentum, non potestas, non magistratus ullus aliis
negotiis ac legibus impeditus, reus denique quo minus xvir fieri
possit, non excipitur; Cn. Pompeius excipitur, ne cum P. Rullo—taceo de ceteris
—xvir fieri possit. praesentem enim profiteri iubet,
quod nulla alia in lege umquam fuit ne in eis quidem magistratibus quorum certus
ordo est, ne, si accepta lex esset, illum sibi conlegam ascriberetis custodem ac
vindicem cupiditatum.
10
hic, quoniam
video vos hominis dignitate et contumelia legis esse commotos, renovabo illud
quod initio dixi, regnum comparari, libertatem vestram hac lege funditus tolli.