De lege agraria contra Rullum, Orationes Volume IV, Cicero, Marcus Tullius, creator; Clark, Albert Curtis, 1859-1937, editor
Made available under the Creative Commons Attribution 4.0 International License.
nam primum, id quod dixi, cum
ceteris in coloniis iiviri appellentur, hi se praetores appellari
volebant. quibus primus annus hanc cupiditatem attulisset, nonne
arbitramini paucis annis fuisse consulum nomen appetituros? deinde
anteibant lictores non cum bacillis, sed, ut hic praetoribus urbanis anteeunt,
cum fascibus bini. erant hostiae maiores in foro constitutae, quae ab
his praetoribus de tribunali, sicut a nobis consulibus, de consili sententia
probatae ad praeconem et ad tibicinem immolabantur. deinde patres
conscripti vocabantur. iam vero voltum Considi videre ferendum vix
erat. quem hominem 'vegrandi macie torridum' Romae contemptum,
abiectum videbamus, hunc Capuae Campano fastidio ac regio spiritu cum videremus,
Blossios mihi videbar illos videre ac Vibellios.
iam vero qui metus erat tunicatorum illorum! et
in Albana et Seplasia quae concursatio percontantium quid praetor edixisset, ubi
cenaret, quo denuntiasset! nos autem, hinc Roma qui veneramus, iam
non hospites, sed peregrini atque advenae nominabamur.