In Catilinam, M. Tullius Cicero. M. Tulli
Ciceronis Orationes: Recognovit brevique adnotatione critica instruxit Albertus
Curtis Clark Collegii Reginae Socius. Albert Curtis Clark. Oxonii. e Typographeo
Clarendoniano. 1908. Scriptorum Classicorum Bibliotheca
Oxoniensis.
Made available under the Creative Commons Attribution 4.0 International License.
4
video, patres conscripti, in me omnium vestrum ora atque
oculos esse conversos, video vos non solum de vestro ac rei publicae
verum etiam, si id depulsum sit, de meo periculo esse sollicitos.
est mihi iucunda in malis et grata in dolore vestra erga
me voluntas, sed eam per deos immortalis! deponite atque obliti salutis
meae de vobis ac de vestris liberis cogitate. mihi si haec
condicio consulatus data est ut omnis acerbitates, omnis dolores
cruciatusque perferrem, feram non solum fortiter verum etiam libenter,
dum modo meis laboribus vobis populoque Romano dignitas salusque
pariatur.
ego sum ille consul, patres conscripti, cui non forum in quo
omnis aequitas continetur, non campus consularibus auspiciis
consecratus, non curia, summum auxilium omnium gentium, non domus,
commune perfugium, non lectus ad quietem datus, non denique haec sedes honoris[*]honoris sella (id est sella t) curulis add. codd.: del. Muretus
umquam vacua mortis periculo atque insidiis fuit. ego
multa tacui, multa pertuli, multa concessi, multa meo quodam dolore in
vestro timore sanavi. nunc si hunc exitum consulatus mei di
immortales esse voluerunt ut vos populumque Romanum ex caede
miserrima[*]miserrima AV
αβ: miseria cett.
, coniuges liberosque vestros virginesque Vestalis ex acerbissima
vexatione, templa atque delubra, hanc pulcherrimam patriam omnium
nostrum ex foedissima flamma, totam Italiam ex bello et vastitate
eriperem, quaecumque mihi uni proponetur[*]proponeretur a
fortuna subeatur. etenim si Lentulus suum nomen inductus a vatibus fatale ad perniciem rei
publicae fore putavit, cur ego non laeter meum consulatum ad salutem
populi Romani prope fatalem exstitisse?