de Natura Deorum, Cicero, Marcus Tullius, creator; Plasberg, Otto, 1869-1924, editor
Made available under the Creative Commons Attribution 4.0 International License.
Illud video pugnare te, species ut
quaedam sit deorum, quae nihil concreti habeat nihil
solidi nihil expressi nihil eminentis, sitque pura levis
perlucida. dicemus igitur idem quod in Venere Coa:
corpus illud non est sed simile corporis, nec ille fusus
et candore mixtus rubor sanguis est sed quaedam sanguinis similitudo; sic in Epicureo deo non rem sed
similitudines esse rerum.
Fac id quod ne intellegi quidem potest mihi esse persuasum; cedo mihi istorum adumbratorum deorum liniamenta atque formas.
Non deest hoc loco copia rationum, quibus docere velitis humanas esse formas
deorum; primum quod ita sit informatum anticipatum-
que mentibus nostris, ut homini, cum de deo cogitet,
forma occurrat humana; deinde cum, quoniam rebus
omnibus excellat natura divina, forma quoque esse
pulcherrima debeat, nec esse humana ullam pulchriorem; tertiam rationem adfertis, quod nulla in alia figura domicilium mentis esse possit.