de Natura Deorum, Cicero, Marcus Tullius, creator; Plasberg, Otto, 1869-1924, editor
Made available under the Creative Commons Attribution 4.0 International License.
Iam
vero operibus hominum id est manibus cibi etiam varietas invenitur et copia. nam et agri multa efferunt
manu quaesita, quae vel statim consumantur vel mandentur condita vetustati, et praeterea vescimur bestiis
et terrenis et aquatilibus et volantibus partim capiendo
partim alendo. Efficimus etiam domitu nostro quadripedum vectiones, quorum celeritas atque vis nobis
ipsis adfert vim et celeritatem. nos onera quibusdam
bestiis nos iuga inponimus; nos elephantorum acutissumis sensibus nos sagacitate canum ad utilitatem nostram abutimur; nos e terrae cavernis ferrum elicimus
rem ad colendos agros necessariam, nos aeris argenti
auri venas penitus abditas invenimus et ad usum aptas
et ad ornatum decoras. Arborum autem confectione
omnique materia et culta et silvestri partim ad calficiendum corpus igni adhibito et ad mitigandum cibum
utimur, partim ad aedificandum, ut tectis saepti frigora
caloresque pellamus;
magnos vero usus adfert ad navigia facienda, quorum cursibus suppeditantur omnes
undique ad vitam copiae; quasque res violentissimas
natura genuit earum moderationem nos soli habemus,
maris atque ventorum, propter nauticarum rerum scientiam,
p.112
plurimisque maritimis rebus fruimur atque utimur. Terrenorum item commodorum omnis est in homine dominatus: nos campis nos montibus fruimur,
nostri sunt amnes nostri lacus, nos fruges serimus nos
arbores; nos aquarum inductionibus terris fecunditatem damus, nos flumina arcemus derigimus avertimus;
nostris denique manibus in rerum natura quasi alteram
naturam efficere conamur.