de Natura Deorum, Cicero, Marcus Tullius, creator; Plasberg, Otto, 1869-1924, editor
Made available under the Creative Commons Attribution 4.0 International License.
At enim quaerit apud
Xenophontem Socrates unde animum arripuerimus si
nullus fuerit in mundo. Et ego quaero unde orationem
unde numeros unde cantus; nisi vero loqui solem cum
luna putamus cum propius accesserit, aut ad harmoniam canere mundum ut Pythagoras existimat. Naturae ista sunt Balbe, naturae non artificiose ambulantis ut ait Zeno, quod quidem quale sit iam videbimus, sed omnia cientis et agitantis motibus et mutationibus suis.
Itaque illa mihi placebat oratio de convenientia consensuque naturae, quam quasi cognatione
continuatam conspirare dicebas, illud non probabam,
quod negabas id accidere potuisse nisi ea uno divino
spiritu contineretur. illa vero cohaeret et permanet
naturae viribus non deorum, estque in ea iste quasi
consensus, quam συνπάθειαν Graeci vocant; sed ea
quo sua sponte maior est eo minus divina ratione fieri
existimanda est.