Epistulae ad Atticum, Epistulae Volume II, Pars Prior Pars Posterior Epistulae Ad Atticum. Cicero, Marcus Tullius, creator; Purser, Louis Claude, 1854-1932, editor
Made available under the Creative Commons Attribution 4.0 International License.
10
Scr. in Sinuessano vi Id. Nov. a. 710 (44).
CICERO ATTICO salutem
vii Id. veni ad me in Sinuessanum. eodem die vulgo loquebantur
Antonium mansurum esse Casilini. itaque mutavi
consilium; statueram enim recta Appia
Romam. facile me ille esset adsecutus. aiunt enim eum
Caesariana uti celeritate. verti igitur me a
Menturnis
Arpinum versus. constitueram ut v Idus aut
Aquini manerem aut in Arcano.
nunc, mi Attice, tota mente incumbe in hanc curam; magna
enim res est. tria sunt autem, maneamne Arpini an propius
accedam an veniam Romam. quod censueris faciam. sed
quam primum. avide exspecto tuas litteras. vi Idus mane e
Sinuessano.