Aeneid, Virgil. (Vergil) The Bucolics, Aeneid, and
Georgics Of Virgil. J. B. Greenough. Boston. Ginn & Co.
1881.
Made available under the Creative Commons Attribution 4.0 International License.
300
spumantisque rates arvis inferre Latinis,
301
donec rostra tenent siccum et sedere carinae
302
omnes innocuae, sed non puppis tua, Tarchon.
303
Namque inflicta vadis dorso dum pendet iniquo,
304
anceps sustentata diu fluctusque fatigat,
305
solvitur atque viros mediis exponit in undis
306
fragmina remorum quos et fluitantia transtra
307
impediunt, retrahitque pedem simul unda relabens.
308
Nec Turnum segnis retinet mora, sed rapit acer
309
totam aciem in Teucros et contra in litore sistit.
310
Signa canunt. Primus turmas invasit agrestis
311
Aeneas, omen pugnae, stravitque Latinos
312
occiso Therone, virum qui maximus ultro
313
Aenean petit: huic gladio perque aerea suta,
314
per tunicam squalentem auro latus haurit apertum.
315
Inde Lichan ferit, exsectum iam matre perempta
316
et tibi, Phoebe, sacrum: casus evadere ferri
317
quo licuit parvo? Nec longe Cissea durum
318
immanemque Gyan, sternentis agmina clava,
319
deiecit Leto: nihil illos Herculis arma
320
nec validae iuvere manus genitorque Melampus,
321
Alcidae comes usque gravis dum terra labores
322
praebuit. Ecce Pharo, voces dum iactat inertis,
323
intorquens iaculum clamanti sistit in ore.
324
Tu quoque, flaventem prima lanugine malas
325
dum sequeris Clytium infelix, nova gaudia, Cydon,
326
Dardania stratus dextra, securus amorum,
327
qui iuvenum tibi semper erant, miserande iaceres,
328
ni fratrum stipata cohors foret obvia, Phorci
329
progenies, septem numero, septenaque tela