Metamorphoses, TEI XML Edition Enhanced with Syntax Diagrams for 1.1-1.9 and 1.163-1.773. Ovid. Metamorphoses. Hugo Magnus.
Gotha (Germany). Friedr. Andr. Perthes. 1892
Made available under the Creative Commons Attribution 4.0 International License.
151
vel non cognoscet vel dilexisse negabit:
152
usque adeo mutata ferar, nullique videnda,
153
voce tamen noscar; vocem mihi fata relinquent.”
Achaemenides apud Polyphemum.
154
Talia convexum per iter memorante Sibylla
155
sedibus Euboicam Stygiis emergit in urbem
156
Troius Aeneas sacrisque ex more litatis
157
litora adit nondum nutricis habentia nomen.
158
Hic quoque substiterat per taedia longa laborum
159
Neritius Macareus, comes experientis Ulixei;
160
desertum quondam mediis e rupibus Aetnae
161
noscit Achaemeniden improvisoque repertum
162
vivere miratus “qui de casusve deusve
163
servat, Achaemenide? cur” inquit “barbara Graium
164
prora vehit? petitur vestra quae terra carina?”
165
Talia quaerenti iam non hirsutus amictu,
166
iam suus et spinis conserto tegmine nullis,
167
fatur Achaemenides: “Iterum Polyphemon et illos
168
adspiciam fluidos humano sanguine rictus,
169
hac mihi si potior domus est Ithacique carina,
170
si minus Aenean veneror genitore nec umquam
171
esse satis potero, praestem licet omnia, gratus.
172
Quod loquor et spiro caelumque et sidera solis
173
respicio, possimne ingratus et impius esse?
174
Ille dedit, quod non anima haec Cyclopis in ora
175
venit, et ut iam nunc lumen vitale relinquam,
176
aut tumulo aut certe non illa condar in alvo.
177
Quid mihi tunc animi (nisi si timor abstulit omnem
178
sensum animumque) fuit, cum vos petere alta relictus
179
aequora conspexi? Volui inclamare, sed hosti
180
prodere me timui: vestrae quoque clamor Ulixis