Fasti, Ovid, 43 B.C.-17 or 18 A.D, creator; Frazer, James George, Sir, 1854-1941, editor
Made available under the Creative Commons Attribution 4.0 International License.
XML: Passage Full Text
nox aderat: querno religant in stipite funem
dantque levi somno corpora functa cibo.
lux aderat: querno solvunt a stipite funem;
ante tamen posito tura dedere foco,
335
ante coronarunt puppem et sine labe iuvencam
mactarunt operum coniugiique rudem,
est locus, in Tiberim qua lubricus influit Almo
et nomen magno perdit in amne minor:
illic purpurea canus cum veste sacerdos
340
Almonis dominam sacraque lavit aquis,
exululant comites, furiosaque tibia flatur,
et feriunt molles taurea terga manus.
Claudia praecedit laeto celeberrima voltu,
credita vix tandem teste pudica dea;
345
ipsa sedens plaustro porta est invecta Capena:
sparguntur iunctae flore recente boves.
Nasica accepit, templi non perstitit auctor:
Augustus nunc est, ante Metellus erat.’
substitit hic Erato, mora fit; sic cetera quaero:
350
"dic," inquam "parva cur stipe quaerat opes."
‘contulit aes populus, de quo delubra Metellus
fecit,’ ait "dandae mos stipis inde manet."
cur vicibus factis ineant convivia, quaero,
tunc magis, indictas concelebrentque dapes
355
"quod bene mutant sedem Berecyntia," dixit
"captant mutatis sedibus omen idem."
institeram, quare primi Megalesia ludi
urbe forent nostra, cum dea (sensit enim)
"illa deos" inquit ‘peperit, cessere parenti,
360
principiumque dati Mater honoris habet.’