Alpheios Texts

1
Iam fera Caesaribus Germania, totus ut orbis,
2
victa potest flexo succubuisse genu,
3
altaque velentur fortasse Palatia sertis,
4
turaque in igne sonent inficiantque diem,
5
candidaque adducta collum percussa securi
6
victima purpureo sanguine pulset humum,
7
donaque amicorum templis promissa deorum
8
reddere victores Caesar uterque parent,
9
et qui Caesareo iuvenes sub nomine crescunt,
10
perpetuo terras ut domus illa regat,
11
cumque bonis nuribus pro sospite Livia nato
12
munera det meritis, saepe datura, deis,
13
et pariter matres et quae sine crimine castos
14
perpetua servant virginitate focos;
15
plebs pia cumque pia laetetur plebe senatus,
16
parvaque cuius eram pars ego nuper eques.
17
nos procul expulsos communia gaudia fallunt,
18
famaque tam longe non nisi parva venit,
19
ergo omnis populus poterit spectare triumphos,
20
cumque ducum titulis oppida capta leget,
21
vinclaque captiva reges cervice gerentes
22
ante coronatos ire videbit equos,
23
et cernet vultus aliis pro tempore versos,
24
terribiles aliis inmemoresque sui,
25
quorum pars causas et res et nomina quaeret,
26
pars referet, quamvis noverit illa parum.
27
‘hic, qui Sidonio fulget sublimis in ostro,
28
dux fuerat belli, proximus ille duci.
29
hic, qui nunc in humo lumen miserabile fixit,
30
non isto vultu, cum tulit arma, fuit.
31
ille ferox et adhuc oculis hostilibus ardens
32
hortator pugnae consiliumque fuit.
33
perfidus hic nostros inclusit fraude locorum,
34
squalida promissis qui tegit ora comis.
35
illo, qui sequitur, dicunt mactata ministro
36
saepe recusanti corpora capta deo.
37
hic lacus, hi montes, haec tot castella, tot amnes
38
plena ferae caedis, plena cruoris erant.
39
Drusus in his meruit quondam cognomina terris,
40
quae bona progenies, digna parente, fuit.
41
cornibus hic fractis viridi male tectus ab ulva
42
decolor ipse suo sanguine Rhenus erat.
43
crinibus en etiam fertur Germania passis,
44
et ducis invicti sub pede maesta sedet,
45
collaque Romanae praebens animosa securi
46
vincula fert illa, qua tulit arma, manu.’
47
hos super in curru, Caesar, victore veheris
48
purpureus populi rite per ora tui,
49
quaque ibis, manibus circumplaudere tuorum,
50
undique iactato flore tegente vias.
51
tempora Phoebea lauro cingetur  "io"  que
52
miles  "io"  magna voce  "triumphe"  canet,
53
ipse sono plausuque simul fremituque canente
54
quadriiugos cernes saepe resistere equos.
55
inde pet es arcem et delubra faventia votis,
56
et dabitur merito laurea vota Iovi.
57
haec ego summotus qua possum mente videbo :
58
erepti nobis ius habet illa loci : 
59
illa per inmensas spatiatur libera terras,
60
in caelum celeri pervenit illa via [*]fuga, 
61
illa meos oculos mediam deducit in urbem,
62
immunes tanti nec sinit esse boni; 
63
invenitque animus, qua currus spectet eburnos;
64
sic certe in patria per breve tempus ero,
65
vera tamen capiet populus spectacula felix,
66
laetaque erit praesens cum duce turba suo.
67
at mihi fingendo tantum longeque remotis
68
auribus hic fructus percipiendus erit, 
69
atque procul Latio diversum missus in orbem
70
qui narret cupido, vix erit, ista mihi.
71
is quoque iam serum referet veteremque triumphum:
72
quo tamen audiero tempore, laetus ero.
73
illa dies veniet, mea qua lugubria ponam,
74
causaque privata publica maior erit.
Reading Center

Main Menu
