Epistulae ad Atticum, Epistulae Volume II, Pars Prior Pars Posterior Epistulae Ad Atticum. Cicero, Marcus Tullius, creator; Purser, Louis Claude, 1854-1932, editor
Made available under the Creative Commons Attribution 4.0 International License.
13.26
de
Vergili parte valde probo. sic ages igitur. et quidem
id erit primum, proximum Clodiae. quod si neutrum, metuo
ne turbem et inruam in Drusum. intemperans sum in eius rei
cupiditate quam nosti. itaque revolvor identidem in Tusculanum.
quidvis enim potius quam ut non hac aestate absolvatur.
ego, ut tempus est nostrum, locum habeo nullum ubi facilius esse possim quam
Asturae. sed quia qui mecum sunt, credo, quod maestitiam meam
non ferunt, domum properant, etsi poteram remanere, tamen, ut scripsi tibi, proficiscar
hinc ne relictus videar. quo autem? Lanuvio conor equidem in
Tusculanum. sed faciam te statim certiorem. tu
litteras conficies. equidem credibile non est quantum scribam, quin etiam
noctibus; nihil enim somni. heri etiam effeci epistulam ad
Caesarem; tibi enim placebat. quam non fuit malum scribi, si
forte opus esse putares; ut quidem nunc est, nihil sane est necesse mittere.
sed id quidem, ut tibi videbitur. mittam tamen ad te exemplum
fortasse Lanuvio, nisi forte Romam. sed cras scies.