Metamorphoses, TEI XML Edition Enhanced with Syntax Diagrams for 1.1-1.9 and 1.163-1.773. Ovid. Metamorphoses. Hugo Magnus.
Gotha (Germany). Friedr. Andr. Perthes. 1892
Made available under the Creative Commons Attribution 4.0 International License.
333
Pirithoi virtute Chromin. Sed uterque minorem
334
victori titulum quam Dictys Helopsque dederunt:
335
fixus Helops iaculo, quod pervia tempora fecit
336
et missum a dextra laevam penetravit ad aurem;
337
Dictys, ab ancipiti delapsus acumine montis,
338
dum fugit instantem trepidans Ixione natum,
339
decidit in praeceps et pondere corporis ornum
340
ingentem fregit suaque induit ilia fractae.
341
Victor adest Aphareus saxumque e monte revulsum
342
mittere conatur: mittentem stipite querno
343
occupat Aegides cubitique ingentia frangit
344
ossa; nec ulterius dare corpus inutile leto
345
aut vacat aut curat tergoque Bienoris alti
346
insilit haud solito quemquam portare nisi ipsum,
347
opposuitque genu costis prensamque sinistra
348
caesariem retinens vultum minitantiaque ora
349
robore nodoso praeduraque tempora fregit:
350
robore Nedymnum iaculatoremque Lycopen
351
sternit et inmissa protectum pectora barba
352
Hippason et summis exstantem Riphea silvis
353
Thereaque, Haemoniis qui prensos montibus ursos
354
ferre domum vivos indignantesque solebat.
355
Haud tulit utentem pugnae successibus ultra
356
Thesea Demoleon: solido divellere dumo
357
annosam pinum magno molimine temptat;
358
quod quia non potuit, praefractam misit in hostem.
359
Sed procul a telo Theseus veniente recessit
360
Pallados admonitu: credi sic ipse volebat.
361
Non tamen arbor iners cecidit; nam Crantoris alti
362
abscidit iugulo pectusque umerumque sinistrum.