Metamorphoses, TEI XML Edition Enhanced with Syntax Diagrams for 1.1-1.9 and 1.163-1.773. Ovid. Metamorphoses. Hugo Magnus.
Gotha (Germany). Friedr. Andr. Perthes. 1892
Made available under the Creative Commons Attribution 4.0 International License.
787
Saepe faces visae mediis ardere sub astris,
788
saepe inter nimbos guttae cecidere cruentae.
789
Caerulus et vultum ferrugine Lucifer atra
790
sparsus erat, sparsi Lunares sanguine currus.
791
Tristia mille locis Stygius dedit omina bubo,
792
mille locis lacrimavit ebur, cantusque feruntur
793
auditi sanctis et verba minantia lucis.
794
Victima nulla litat magnosque instare tumultus
795
fibra monet, caesumque caput reperitur in extis.
796
Inque foro circumque domos et templa deorum
797
nocturnos ululasse canes umbrasque silentum
798
erravisse ferunt motamque tremoribus urbem.
799
Non tamen insidias venturaque vincere fata
800
praemonitus potuere deum, strictique feruntur
801
in templum gladii; neque enim locus ullus in urbe
802
ad facinus diramque placet nisi curia, caedem.
803
Tum vero Cytherea manu percussit utraque
804
pectus et Aeneaden molitur condere nube,
805
qua prius infesto Paris est ereptus Atridae
806
et Diomedeos Aeneas fugerat enses.
807
Talibus hanc genitor: “Sola insuperabile fatum,
808
nata, movere paras? Intres licet ipsa sororum
809
tecta trium: cernes illic molimine vasto
810
ex aere et solido rerum tabularia ferro,
811
quae neque concussum caeli neque fulminis iram
812
nec metuunt ullas tuta atque aeterna ruinas.
813
Invenies illic incisa adamante perenni
814
fata tui generis: legi ipse animoque notavi
815
et referam, ne sis etiamnum ignara futuri.
816
Hic sua complevit, pro quo, Cytherea, laboras,